26/01/2019

نوسەرێك: ئاتێلا دواین عاشق، رۆمانێكی مەزنە بۆ مێژووی كورد نوسراوە

رۆمانی”ئاتێلا دواین عاشق” كە لەلایەن نوسەر و سیاسەتمەداری کورد، سەردار عەبدوڵڵاوە نوسراوە و لەسەرەتای مانگی رابردوودا بڵاوكرایەوە، دەنگدانەوەی زۆری لە میدیا و ناوەندە عەرەبی و كوردییەكاندا دروست كردووە، بەهۆی ناوەڕۆكی رۆمانەكە و ئاماژە و ئاستى بەرزی لە هونەر و تێكستی نوسینەكەدا، ئەمە جگەلەوەی زمانی نووسینی رۆمانەکەش گرنگی زیاتری پێداوە.

زۆرێک لە شاعیر و نوسەری دیاری کورد و عەرەب لەسەر رۆمانەکە نوسیویانە، دواهەمینیان خاتوو ئەرخەوان رەسوڵی ژنە شاعیر و نوسەری دیاری كوردە، خاتوو ئەرخەوان لە بارەی رۆمانەكەوە لە لاپەرەی خۆی لە تۆڕی کۆمەڵایەتی فەیسبووک نوسیویەتی”رۆمانی “آتیلا آخر العشاق” گرنگییەكەی ئەوەیە راستەوخۆ دەكەوێتە بەر چاوی خوێنەرو رەخنەگری عەرەب و لەرێی روداو و بەسەرهاتەكانیەوە كورد دەناسن و ئەو راستیانە دەبینن كە رەنگە لای زۆریان شاراوە بووبێ.

نووسەر بە سەلیقە و توانایەكی بێ وێنەوە دەمانباتە نێو دنیای تەسوفەوە و لەگەڵ دنیای عەشق و سیاسەتدا ئاوێتە دەبن

هەر لە نوسینەكەدا ناوبراو باسی تێكەڵكردنی عەشقی كردووە لە رۆمانەكەدا و نوسیویەتی”چرای دەستی نووسەر بۆ رۆشن كردنەوەی رێگاكان وتە پیرۆزەكانی فریدالدین عەتار، رۆحی عەتار لە نێو هەموو دێرەكاندا نوردەبەخشێ بە فكری رۆمانەكە ، نووسەر بە سەلیقە و توانایەكی بێ وێنەوە دەمانباتە نێو دنیای تەسوفەوە و لەگەڵ دنیای عەشق و سیاسەتدا ئاوێتە دەبن. عەشق ، پانتاییەكی گەورەی رۆمانەكەی داگیر كردووە ، عشقی خوا و مرۆڤ وخاك و شۆڕش و تەنانەت ئاژەڵیش . عشقەكان تا بڵێی گەورەن ، پیرۆزن ، راستەقینەن ، بەڵام پڕن لە ئێش وئازارو خەم وگریان و سەركەوتن و شكست.”

مردن یەكێكی ترە لە بابەت”Theme”ەكانی رۆمانەكە و تێیدا باس لە چەند جۆرێكی مردن كراوە و ئەرخەوان رەسوڵ لەو بارەوە نوسیویەتی”مردنی جۆراوجۆر، مردنی تەنیا و مردنی بە كۆمەڵ و مردنی ئەفسانەیی و مردنی جەرگبڕو بە سوێ .. هەموو جۆرەكانی مردن لەم رۆمانەدا دەبینی. وەك دەڵێن بابەتی سەرەكی هەموو رۆمانەكان عشق و مردنە.

لە رێگەی عەشقی ئاتێلاوە دەچینە ناو پەرستگەی عشقێكی پیرۆزەوە

ئەرخەوان رەسوڵ لە بەشێكی تری نوسینەكەدا باسی “عەشق” و “گریان” و چەند بابەتێكی تری رۆمانەكەی كردووە و نوسیویەتی”لە رێگەی عەشقی ئاتێلاوە دەچینە ناو پەرستگەی عشقێكی پیرۆزەوە، پەرستگەیەك خوا خۆی لەوێ لە نێو موناجات و نزاو پاڕانەوەكانی ئاتێلادا ، لە نێو شك و یەقینەكانیدا، تەنانەت لە نێو كفرەكانیشیدا وجودی هەیە، خوای كورد ئەو خوا بێدەنگەی ئاتێلا هەمیشە خۆشی دەوێ و هەمیشەش لەشەڕدایە لە گەڵی و گلەیی لێ دەكات و كەچی لەبەر خاتری عەشقەكەی هەرگیز دەستبەرداری نابێت. گریان لەم رۆمانەدا ناكۆتایە پیاوەكان لە ژن و منداڵەكان زۆرتر دەگرین، گریانەكانیش هەندێ جار بە تەنیا و زۆر جاریش بە كۆمەڵ دەگرین ، گریانێك كە لە رۆحەكانەوە سەرچاوە دەگرێ و ئەگەر ببوایە بە لافاو تەڕو وشكی رادەماڵی”.

لە بەشێكی تری نوسینەكەدا، ئەرخەوان رەسوڵ باسی سەلیقەی نوسەری رۆمانەكە دەكات، كە بە توانایەكی زۆرەوە گوزارشتی لە بابەتەكانی، جیاوازی كۆمەڵایەتی، چینایەتی، نەتەوەیی، ئاینی و فكر و سیاسەت و چەند بابەتێكی تری كردووە”ئەم رۆمانە دنیایەكی تایبەتە ، نووسەر لە هەموو بوارەكاندا توانا و سەلیقەی خۆی سەلماندووە بواری كۆمەڵایەتی و جیاوازیی چینایەتی ، جیاوازیی نەتەوەیی ،جیاوازیی ئاینی ، بواری فكر و سیاسەت ، بواری شوێنەوارو كەلتور، داستان و ئەفسانەو ئەدەب و هونەر و گۆرانی و میوزیك .. هەموو وردەكارییەكانی ژیانی ئەم میللەتە لەم رۆمانەدا جێ و رێی خۆیان گرتووە. ئەم رۆمانە هەر گێڕانەوە نییە ، بەڵكو نووسەر لێكدانەوەی خۆی و زانیاریەكی فراوانی تێكەڵ بە گێرانەوەكان كردوە ، لەسەر زۆربەی بابەتەكان قسەی خۆی هەیە و روونكردنەوە و لێكدانەوەی هەیە كە خوێنەر سودی لێ وەردەگرێت. ئەو پێكە عارەقەی لە دەستپێكی رۆمانەكەوە وجودی هەیە تا كۆتایی ، نهێنی راست ودروستی عشقێكمان بۆ دەسەلمێنێ عشقێك لە نێوان خواكەی ئاتێلا و خودی ئاتێلا خۆیدا. من نامەوێ باسی بەسەرهات و روداوەكانی رۆمانەكەتان بۆ بكەم ، خۆتان بیخوێننەوە، ئەوەندە دەڵێم سەردار عەبدوڵڵا كە وەك نووسەرێكی سیاسی ناسراوە، رۆمانێكی مەزنی بۆ مێژوی كورد نووسیوە، دەست خۆشیی لێ دەكەم”.

برادۆست میدیا

كۆمێنتی خۆت جێبێلە

هەواڵی تر

تا ئێستا تامی نوقڵەکە لە دەممدایە

چیرۆک ـ رۆژانە کوڕێکی لاو، سەردانی ئەو پیرەمێردەی دەکرد، کە لەسەر تەختی نەخۆشخانەکە راکێشا…