04/08/2019

نامەیەك بۆ شەشهەمین ساڵیادیی باوكم!

برادۆست میدیا ـ ووتار

بابە گیان سڵاو!

ئەو ڕۆژگارە دوورودرێژانەی لە كەنار خەونێكی منداڵیدا بووم……
كە نمام كرد و فڕینم گەورە بوو؛ چوون بەچكە هەڵۆیەكی ”كۆ”
لەسەر دارسنەوبەرە سەوزەكانی شیعریی تۆ!
منداڵ بووم وەك خونچەی گوڵێكی پێشوەخت هەڵوەریوو!
بچووكبووم وەك بەچكە هەڵۆیەكی هەڵنیشتوو، چاوەڕێ بۆ
لەخەوهەڵسان و فڕینێ بەرەو ئاسۆ!

ئێستا لەدوای ڕۆیشتنی تۆ…شەقژنەكانم لە ڕەنگی تەنیایی و لە ڕەنگی
غەریبیی و لە ڕەنگی پاركی ئازادیی و لە ڕەنگی بێزاریی جادەی سەهۆڵەكە و
لە ئاهی چریكەی دیلان و لە خەونی پچڕاویی ”خوایە وەتەن ئاواكەی بێكەس ” ئەچێت! ئەوسا ئیتر ئەبم بە پاركی مانگەشەو بۆ دڵداران و ئەبم بە سایە و
سێبەری ئێوارانی عاشقانەی گەنجەكانی ئێستایی ڕاكشاوی سەر
ئارامگەكەی پاركی ئازادیی نیشتمان!

بابە گیان!

كە بیركردنم و غەریبیم دائەنیشێ و ئەم نامەیەت بە خەتێكی
شڵەژاوی مانگی مەرگی ئاب بۆ ئەنووسێ……
كەم كەس تێی ئەگا جگە لە خۆم!
كەس بۆی ناخوێنرێتەوە؛ جگە لە خۆم!
هەربۆیەیش چاپی ناكەم و بە دەستوخەتێكی ڕاڕا و شپرزە كە هەمووی
تێكەڵەیەكە لەو ”سەدویەك ڕۆژ تەنیایی ”ەی كە تۆ شیعرت تیا نەنووسی و
چوون تەمومژی شەختەیی ئەم قوتبە شینە ئاوابووی!

بابە گیان! كە ئێستایش دائەنیشم و شانی ڕاست دائەدەمە سەر
پاركی ئازادیی و دەستی چەپم لەناو بەرۆكی درەختەكانی ئەم پاركەدا
نوقم ئەكەم؛ دائەنیشم و چوون هەورێكی نەباریوو، چوون پەنگخواردنەوەی
فرمێسكێكی هەڵنەوەریو، شیعرنامە و نامە كۆنەكانت ئەخوێنمەوە …
بابە گیان ئێستا من كوڕەخەمێكتم مووروی ملوانكەی پچڕاوی بێوەفایی
ئەم پاركە ئەهۆنمەوە بۆ گەردنی عاشقانی شیعری تۆ!
ئاخ و داخێك لە سینەی كون كونی ئەم پاركەوە دێتەدەرێ…..و دەستی
ماڵئاوایی لە ڕەنگی كوژراوی ئەم شارە هەڵئەبڕێ!

بابە گیان!

لە كۆتایی نامەكەدا ئەڵێم؛
تۆ هەر خۆت و قەڵەمی دەستت،
تۆ هەر خۆت و خەمی گەشت، پێش شەپۆلی شیعر كەوتوویت!
مەرگت سەراپایی نەمر بووە!
درەختەكانی ئەم پاركە و سەوزیی باڵای شیعری تۆ لە هەڵچووندایە و
باخی ئاو، گوڵی ورشەوپرشەداریی بۆ كچی شیعریی تۆ گرتووە!
”من ئێستا ئەزانم مردن ئێجگار بەو شێوەیە ترسناك و خەتەر نییە
وەكو خەڵكی باسی ئەكەن، من بە تۆدا ئەزانم!”
ئەوە شەش ساڵە لای مردنیت و كەچی هێشتا هەر زیندوویت!
كەچی هێشتا هەر ئەژیت،
وەكو سەوزیی و وەكو ئاو و هەوا
لەوانەیە مردن بمرێ بەڵام تۆ نا!

كوڕی خۆت
هەڵۆ

كۆمێنتی خۆت جێبێلە

هەواڵی تر

تا ئێستا تامی نوقڵەکە لە دەممدایە

چیرۆک ـ رۆژانە کوڕێکی لاو، سەردانی ئەو پیرەمێردەی دەکرد، کە لەسەر تەختی نەخۆشخانەکە راکێشا…